075手竿釣魚---4號腳卜卜脆

075手竿釣魚 --- 4號腳卜卜脆
日期：2022~12~12星期一(十一月十九)
時間1700~1930
釣具：18尺幻匠，17尺4號尼龍主+2B浮波+1B夾鉛+擰圈+1尺4號腳+單勾
魚餌：生蝦
釣場：斜石壆，內灣
水流：（1.45漲1.81）開始水漲，水流左至右打入腳邊
魚穫：火點x1 ，石九x3，怪獸？x1

好耐無去釣夜水啦！今日攞左批文，可以釣一陣玩下。
今日氣溫低，又吹北風手竿釣生蝦真難攪。
不過，有得去釣魚幾難都去啦！
惟有係主絲上加隻浮波做助投，個浮波上面無任何結線，好似釣全游動一樣。
頭三隻蝦一到底，就有魚食。魚訊都好清晰，細魚細力食餌咁。
之後第四口開始，零魚訊。仲掛左幾次底，好彩抽兩三嘢就甩左。
再中多一口細石九，就係咁等。
最後終於到左今晚的高潮。
勾好隻蝦仔，頂住北風，左手拉緊條絲，右手拋竿。
浮波落水，等左一陣又打左埋腳邊。跟住輕輕提高支竿，
拉到竿頭微彎，感覺到隻蝦彈左一下，跟住有魚細細力食左兩下。
開頭以為係魚仔啦！單手細力一抽。嘩！點知佢係腳下由右向左走。
有小小力水。心諗，係佢啦！扎好個碼步，立即雙手揸竿，一頂！
全個過程唔駛三秒，呼……，咁就斷左4號腳。
唔知係D 絲耐得滯太舊，變得翠左定太幼腳。
抑或條魚棚牙好利，因為唔係過石斷係隻勾對上小小斷左腳。
總之，全晚得呢一口最大反應，跟住成個鐘一口都無夠鐘就走人。
後記：
斷左口之後，都有見到有幾條魚仔跳水，應該係畀大魚追。
可惜，都係無鱸魚係到。由於水漲緊都唔敢企得太低，
離水邊都有四五尺（一舊石距離到）。
突然見到開始打浪，幾大下咁！心諗今晚水漲緊係咁。
唔係喎！海平面係落左然後打上黎，一個係咁，兩個係咁。
抬頭一望，見到右手邊石壆，D浪打到過左黑色線，
上左白色的石面。浪頭到浪底有成米高。我咪係企左係黑色線上囉！
咪啦！走高兩步先。一上完，鞋面都濕濕地。
好彩走得快，唔係就會見報啦！釣魚真係要小心打浪呀！

好耐無見你釣魚