攪活動或開班既小小心得

之前話過會同大家分享下我修讀培訓課程時學到既技巧，希望各位師兄師姐攪活動時可以用得著。

為左可以講解得詳盡ｄ，我會用攪投釣新手班黎作為一個例子，而如果只係諗住攪活動的話，其實字眼上改改佢已經可以，基本上係大同小異。

首先就係要講出＜課堂目的＞，其實就有小小似一個宣傳，主要係包括左一般目標或學習策略；仲有方向同動機既描寫。舉例：

投釣在香港逐漸開始普及起來，全靠一眾師兄們對投釣不遺餘力的推廣，加入投釣大家庭的釣友數目一直有增無減。而且投釣的裝備較其他很多釣法的裝備來得便宜，而釣法亦更來得簡單直接，確是對未接觸過釣魚的朋友有一定的吸引力。

課堂上，學員會學到釣組的運用和拖釣的技巧，為他們日後加入投釣行列前，先提供實用的基礎訓練。

以上呢段就係一個比較ｆｏｒｍａｌ既課堂目的敘寫實例，只係作為參考，可能好多師兄師姐會覺得麻煩，但攪任何活動前如果可以將個目的寫得清晰ｄ既話其實係有好多好處，至於有咩好處呢度唔多講住，如果有師兄想深入了解我日後再慢慢解釋。

做好左個＜課堂目的＞之後就輪到＜學習目標＞喇。

＜學習目標＞係一個好清楚既陳述，佢描述左受訓者響培訓結束既時候，會有能力做到佢地以前做唔到既野。舉例：

在課堂結束時，學員應能夠：

１）了解釣魚的基礎理論，將來可應用在不同環境的釣場上。

２）了解釣魚的安全守則，確保在不傷害到自己及他人的情況下進行釣魚活動。

３）掌握投釣釣組的基本綁法，讓你隨時都可以為實戰做好準備。

４）運用正確的拋投動作，讓你能輕輕鬆鬆做出遠投動作，確保自己的攻擊範圍。

５）觀察打沉底時的魚訊，讓你能把握最佳時機把魚兒釣上來。

６）運用拖釣的技巧，讓你能擴大釣組的攻擊範圍，增加上魚機會。

以上呢個就係一個學習目標既敘寫實例，亦都係比較ｆｏｒｍａｌ既，但作為參考緊係完整ｄ會好ｄ，寫埋學習目標變左學員會對個課堂更加了解，亦都會有左期望，期望自己上完堂可以做到以上呢ｄ自己以前做唔到既野，咁上堂時大家都會有一致既方向，咁進行既時候就會更加得心應手，事半功倍。

當課堂目的同學習目標都寫好左之後，其實可以寫埋目標對象。舉例：

歡迎從未接觸過釣魚和未接觸過投釣而又有興趣人士報名參加，參加者須年滿十八歲或以上。

點解要咁講呢，首先既然係新手班，一定唔希望有老手參加，因為俾左個學位老手參加，就少左個位俾新手學野。而且有個老手響班上面，佢可能會有好多意見發表，到時就好可能會拖延左個教學進度，甚至乎出現你有你教，我有我玩既情況，最驚係有新手見佢講得咁犀利，玩得咁開心就走左去同佢玩埋一份，唔專心上堂，攪到個課堂場面比較混亂。所以如果有老手要玩埋一份咁點算？好簡單，問下佢願唔願意安排佢做助教，咁到時分分鐘仲可以收多２個學生黎上堂添。至於十唔十八歲果Ｄ，就大家鐘意，我都係舉例姐。

[ 本帖最後由 順仔 於 2008-5-23 23:39 編輯 ]

當做完課堂目的同埋學習目標後，就可以正式招生喇，而收生後一定一定一定一～～～～～定要做既就係學生既能力預估。點樣做預估呢？簡單Ｄ講就係由頭到腳咁了解個學員，要知道佢性別啦，年齡啦，釣左幾耐魚啦，玩開咩釣法啦，再深入Ｄ可以問埋佢職業啦，教育程度啦等等等等。咁開班咪好似查家宅咁？其實嚴格黎講都係架。

其實要咁多資料黎做咩呢？例如開班前已經了解左學員既能力，發現原來有２０個人報名，可能２０個人都釣左一段時間魚，好多基本野都識晒，咁響開班時就可以考慮減少甚至剔除一Ｄ最基本既內容，好似安全或者理論咁，反而放多Ｄ時間落技巧教學度仲實際。咁如果２０個報名，其中２個未釣過魚，其餘１８個就釣左一段時間魚咁又點呢？攪手可以考慮同岩岩既安排一樣，只係果２位新手學員就要響上堂前要早上個先修班先，聽下Ｄ理論同埋安全守則先，咁就變左唔洗浪費埋果１８位老手既時間喇。

咁點解要問埋人地學歷呀，職業呀？學員可能咩人都有，如果有學員係唔識英文既，而導師可能準備左Ｄ筆記上面係有Ｄ英文既，咁就可能要執執佢喇。又或者成班學員既教育程度都好低，仲要成班都係釣魚新手，咁可能安排返個理論課既時間都要長返少少，因為據我自己既經驗，教育程度比較低既學員，對佢地黎講上理論課時通常會有一定既難度。正所謂有教無類，但亦都要因材施教，咁樣攪出黎既活動先會有效率。

但當然釣魚只係一Ｄ興趣班，要唔要做到咁仔細就由各位師兄自己決定喇。好似好多教學可能都係一Ｄ好顯淺易明既口述就攪掂，咁響咩教育程度之類可以唔洗理佢都得。不過都係果句啦，一係唔講，要講就講得詳盡Ｄ咁解姐。

[ 本帖最後由 順仔 於 2008-5-23 23:43 編輯 ]

之後亦都係最後，同埋亦都係成個POST最值錢既地方，就輪到一個都幾麻煩既課堂計劃喇。課堂計劃做黎就淨係俾攪手睇既姐，唔需要將佢公開出黎俾學員睇既，作用係方便自己分配時間同埋安排課堂既進度，講多無謂，舉例：

投釣新手班的課堂計劃

課堂名稱：投釣新手班　　　導師名稱：骨精強　　　

學生群：２０名在職人士，男性，年齡２２～４０歲，沒有釣魚經驗。

上課日期：２０ＸＸ年Ｘ月Ｘ日　　　上課時間：０９：００～１４：００

上課地點：馬鞍山烏溪沙沙灘

時間	階段名稱	階段目標	教學資源	教學材料	教學方法	評估方法
09:00~09:15	導師自我介紹	打破與學員間的隔膜,打好關係,樹立形象	無	中魚照片,與名人的合照	講授	學員反應(眼神接觸,點頭,微笑)
09:15~09:20	課堂守則	確保課堂順利進行	無	無	口述	學員反應(眼神接觸,點頭,微笑)
09:20~09:40	介紹課堂目標和學習目標	與學員達成共識,確保各人對課堂的期望和方向一致	無	無	口述	詢問學員是否同意及明白
09: 40~10:10	理論講解	先讓學員對課題有基礎認識,為往後教導技巧前作好準備	無	筆記,圖片	講授	詢問學員是否同意及明白
10:10~11:00	教導技巧	讓學員能真正掌握投釣技巧	投竿,沙灘絞	投釣絲,沙鑽勾,天秤,中通鉛,擰圈,擋珠,青虫,紅虫	導師示範	詢問學員是否明白
11:00~13:30	學員實操	檢查學員的理解程度及技巧	投竿,沙灘絞20套	投釣絲,沙鑽勾,天秤,中通鉛,擰圈,擋珠,青虫,紅虫	學員實操	觀察學員投釣技巧
13:30~14:00	總結	加深學員對課堂的印象	無	無	口述	學員反應(眼神接觸,點頭,微笑，掌聲)

只要一個導師肯做以上呢個課堂計劃，你想佢到時教教下失預算都幾難，課堂計劃唔需要將所教既內容寫晒出黎，因為只要將課堂既時間分配好，同埋將所需要用到既資源同材料列舉晒出黎，其實要點教已經響導師個腦度。我諗我將呢個課堂計劃交俾一位唔識教人，但玩投釣叻既師兄去開班，可能佢已經可以成為一位好導師。

[ 本帖最後由 順仔 於 2008-5-24 01:46 編輯 ]

都係時候為我岩岩寫既課堂計劃做返Ｄ講解喇，總之做課堂計劃最起碼最起碼要有七七四十九格。邊七七四十九格呢？大家睇返個課堂計劃，打直睇會有７個階段，打橫睇有７項資訊，呢個係最基本要求。但其實想再仔細Ｄ可以將某Ｄ階段再細分幾項，好似教導技巧果個階段，其實可以分為３階段就仲好，第１個係教ＳＥＴ釣組，第２個係教拋投動作，第３個教拖釣技巧，你鐘意分多個觀察魚訊技巧都得，但因為想大家對七七四十九呢個印象深刻Ｄ，所以今次就反而無細分得咁詳盡，請見諒。

至於每個階段有咩用，其實相信各位師兄師姐睇埋個階段目標已經估到，所以呢度都唔詳細研究，反而係想講下個評估方法。其實以上果七七四十九格次序一定唔可以亂，因為話明係階段，如果連第１個階段都未完成就一定去唔到第２個階段，好似話自我介紹都唔做，同學員關係都未打好，就同佢講課堂守則，就會攪到個氣氛差左，學員對導師既印象都唔會好，其實會對課堂有影響，所以一定要一步一步黎。但點先知道自己已經完成左個階段呢？就要靠評估方法喇。所以我會清楚列明每個階段既評估方法，例如你自我介紹時其實只需要留意學員既反應，已經知道自己做得成唔成功。

重有一點係好多人會混淆既，就係教學資源同教學材料喇。有人認為咪又係釣具？點解仲要將佢地分成資源同材料？其實簡單Ｄ講呢，資源係可以用黎做其他用途既硬件，而材料就係軟件，做唔到其他用途既。舉例：

電腦，滑鼠，鍵盤，ＭＯＮ，喇叭係硬件
ＭＥＤＩＡ　ＰＬＡＹＥＲ係軟件

係人都知啦！！！係呀，就係咁簡單。所以電腦，滑鼠，鍵盤，ＭＯＮ，喇叭係資源，ＭＥＤＩＡ　ＰＬＡＹＥＲ係材料。因為ＭＥＤＩＡ　ＰＬＡＹＥＲ只可以用黎聽歌或者睇片，唔會有人可以用佢黎整個ＰＯＷＥＲＰＯＩＮＴ出黎卦？資源配合材料即係用電腦既ＭＥＤＩＡ　ＰＬＡＹＥＲ黎睇片。但電腦，滑鼠，鍵盤，ＭＯＮ，喇叭等資源就可以配合唔同材料做唔同既野，例如我用ＭＳＮ就可以同朋友網上傾偈，用小畫家就可以畫下畫。

咁點解投竿，沙灘絞係資源？？因為我用投竿，沙灘絞唔一定係教投釣拖釣，我可以用佢地黎教我自創既投竿搓波仔，又可以教用投竿玩浮波，所以投竿，沙灘絞一定係資源，而講到呢度，相信大家已經明白埋點解投釣絲,沙鑽勾,天秤,中通鉛,擰圈,擋珠,青虫,紅虫果Ｄ係材料喇。其實資源材料果度仲有好多野可以寫出黎，好似冰箱啦，剪線鉗啦等等等等，寫得越詳細就越好，不過我唔想俾人感覺好似太長氣。

對於今次既心得分享暫時係咁多，其實要講呢就仲有大把野講既，但我諗住將最實用既抽出黎同大家分享就算，各位師兄師姐下次攪活動前不妨參考一下，或者會對大家有幫助。


[ 本帖最後由 順仔 於 2008-5-24 02:28 編輯 ]

好詳盡, 就算我而家用唔著, 雖然你可能未寫完, 但明白左好多(平時真係無學過), 其他有心攪活動或課程既師兄都可以作參考

[ 本帖最後由 appdee 於 2008-5-23 09:25 編輯 ]

有機會同你分享 教學技巧 啦...

原帖由 gilsonli 於 2008-5-23 10:20 發表

                               
登錄/註冊後可看大圖

有機會同你分享 教學技巧 啦...

係？？好呀，我最鐘意分享，又鐘意學野

原帖由 appdee 於 2008-5-23 09:22 發表

                               
登錄/註冊後可看大圖

好詳盡, 就算我而家用唔著, 雖然你可能未寫完, 但明白左好多(平時真係無學過), 其他有心攪活動或課程既師兄都可以作參考

多謝師兄欣賞，我相信師兄你有朝一日一定會用得著

終於都打晒出黎喇～～～～～～～～～～～～～～～～～～～！！
花左我好多心機同時間呀，真係一次好好既溫習機會呀
請各位師兄師姐多多支持