各位,
以下係近期網站的一些情況工作報告及網友通過不同途徑查詢問題的統一回答!!二手版刪帖,禁訪及回帖問題查詢統一回覆
所有二手版內的釣魚用品出讓帖,如無及時直接上載相片而遭受刪帖,此舉係因涉及公平交易及版務管理問題,請各人士認真留意及合作,版內置頂亦已清楚註明,發帖前請務必參考!!
至於版內違規遭受禁訪,亦係無可奈何之安排,因為實在有些人意見多多,他人賣甚麼,他人要甚麼價錢都關佢事,況且賣買之間引伸嘅問題好複雜,不嚴格控制就變成嗌交版!!
因有網友建議為免麻煩事出現,提議二手版取消回帖,我自己就咁睇...老土嘅人,就算無得回帖,佢一樣會於其他版度嘈,有時賣野都係想幫補吓生活,我都想盡量幫吓大家,俾個機會各位頂吓帖,所以暫時唔打算取消回帖.
手機WAP版上魚樂網問題
網站自從升級後,已有網友於不同途徑反映用IPHONE上魚樂網有問題,事因都好無奈...IPHONE本身自帶的瀏覽器已完全放棄支援WAP格式,如果要睇就一定要另外加裝第三方軟件,至於支援情況,小弟並非用戶,實情係點我都係聽朋友網友回報,而且現用的WAP模版亦係由第三方提供,雖然正進行升級工作以更符合目前網站系統,但仲未有完成時間表,最終效果係點又唔知,我需要到時睇睇效果再決定是否另行編寫符合手機上網的非WAP格式模版,如有問題,歡迎各位繼續回報!!
新資訊功能
經過一段時間,網站已一步一步加番d同釣魚有關嘅資訊,例如首頁右傍嘅天氣及潮汐預報,希望對各位出門釣魚有所幫助,至於網站頂部各項參考資料,如時間許可,我會一步一步完善,現已完成部份,有香港及澳門釣店資料,香港人工水庫資料,天氣相關資訊及日本釣具品牌網址等.
離合...人流...種種...
近期有網友向我提問,網站走了一些人對網站有影響嗎??少左人吹水...答案就一定有,不過以網站數據角度黎睇,其實係無乜影響,以每日平均發帖數及每日瀏覽量黎講都差唔多,可以咁講,雖然少左d無無聊聊吹水帖,但都維持到一定情程度帖數,証明內容更加貼合到釣魚內容,其實係好現象!!
保育是魚樂網的責任嗎??
有人曾強烈各向我反映,我地係責無旁貸要宣揚保育信息,呢個亦係做網站嘅責任...
我個人及代表網站就咁睇,經過兩年多辦網嘅時間,我地好明白保育魚源嘅重要性,但唔願意成日為左呢d問題嘈嘈閉,所以用甚麼方法就更重要,如何有用有效去推動保育意識,亦係我地網站未來嘅挑戰,透過比賽及新手活動係我地其中一個推廣重點.
關於魚樂網的比賽
經過今次試辦的路亞賽的反應,我地睇到網友係有實際上的需要,所以魚樂網將會積極規劃以下類型釣魚賽事,供各網友技術交流及聯誼,
牙較賽...現場小型式的較量,曾舉辦過嘅有,2008及2009的國際網絞邀請賽,2009國際白鯽挑戰賽,此類只屬於玩票性質,志在開開心聯誼,我地係會繼續開拓合適題目俾大家參與發揮,大前題最緊要好玩,天馬行空都無所謂!!
網上賽...係本網推動得幾成功的賽事型式,曾舉辦過及正舉辦嘅有,07/08,08/09及09/10路亞海鱸盃,2008及2009紅魔大賽,2008,2009及2010 MAEUCHI CUP,來年魚樂網會繼續於各專題釣法版積極籌辦有關網上賽事!!
現場賽...剛成功舉辦嘅有2009 Lure Tournament,作為一個重要的釣魚媒體平台,不同類型的實質賽事係十分需要,所以於2010年度亦已開始籌劃 EGI Tournament 及 ISO Tournament 的舉行,所有本網站舉辦的大型賽事,宗旨只有一個...非為專業,非為創造名人,只為廣大釣友提供一個有趣味性嘅活動.
關於新手活動
現場新手交流活動,研習課程...係魚樂網黎緊嘅重點工作項目,時間許可的話,我地係會多舉辦,亦會盡量邀約有經驗釣友為大家分享經驗,更重要一點...本網會貫徹公開參與宗旨,無論係任何新手活動,都一概歡迎有經驗釣友參與指導.
naobao @ 2009-12-11 |
提升卡
置頂卡
沉默卡
喧囂卡
變色卡
千斤頂
顯身卡
樓主
一睇就知你唔辛苦啦 !!!
辛苦囉~~加油!