初哥中魚喜與悲

小弟都只不過係近呢個月先開始學下人玩假餌，成個多月流流長，食白果已經成為涼果一樣....經常進食。但響本月30號晚，竟然可以唔駛我再食白果，而成晚既過程，真係令我又想喊...但又非常之有快感，所以希望可以同大家分享一下。

一開始無幾耐，打左大約10下左右啦，竟然見到有一條盧魚，追住我條假餌，直到腳邊水位，但我覺得唔可以比佢發覺條餌係假既，於是我就唔理咁多，照樣收條假餌上水先，然後重覆再投出去，呢次條死人盧魚又係咁追住黎，但又係唔開口.....吼....竟然仲奸過我.....好...再黎過!如是者四下一樣...只係追黎但唔開口，然後失左踪。跟住投出數十次，都係冇乜聲氣既情況下，決定轉位再投。
投左不出20下，中呀!!!係一條長約30cm多既小盧，個心已經好開心，因為係第一次中到魚，慢慢拖近岸，正想用手揪住條魚一刹，比條小盧魚一個番身.....pe斷了...假餌失了.....。
唔緊要，再黎過啦，反正我有既就係時間。接住再投....投左都5-60下...哈!!中呀!!!!但係呢次中既射程有d遠...大約15米左右，真係冇乜信心!....果然，大約拖左5米左右，條盧魚一個番身，跳上水面，又甩左.............。
唉.....算啦，好餓，當時已經係10:00pm，食下野，冷靜一下先再黎過。
要食既食，跟住同人吹左一陣水，手執杆，再黎過!!一邊吹水一邊投，講都冇咁快，投唔到第五下，中呀!!!呢次食硬佢啦!(諗住....)，e.........乜呢次唔左喎，力度好猛!但佢都係要必死!都係照食硬冇走雞!(又係心諗....)。慢慢黎呀!唔好急，跟住緊係叫埋同我吹水果位人兄幫手啦，出動撈機!哇哈哈...呢次仲唔比我一鑊過攞番我呢個月既成果!?拖...放、拖、放，實在太大力，竟然仲未見到條盧既真身，而我身邊位仁兄仲要比我緊張，好囉...經過一輪拖拉，見到佢啦!!!wooooo......長約60cm，實際既重量我唔知，但點都好啦....上左水咪知道囉!heheheeee(開始情緒失控)。接住黎既就係慢拖，隠住條魚，見到差唔多啦!大叫(兄台!!到你出手!)果位魚友就即時手起撈機，出手!黎個最後一擊!!!(@_@....)條魚一見撈機下水，竟然即時發神經，一下狂擺!.....哇...我條魚杆應聲一條變兩條!!!????......都唔緊要!死就死啦!杆斷已經係事實!好在手上仲執住個絞!一手揪住條線再拖!.....又一擺...............兩手空空...........果位魚友，仲緊張過我....(點呀!拖上黎丫!!)....我呆呆咁望住佢......我拖左啦....條絲.............

無lu....身上兩條假餌都盡失，仲眼見盧魚水中狂追小魚...真係灰到爆

但點都好~!証明真係好好玩!同好快感!希望各位新手又好，老大哥都好，有機會大家比d意見我!~~請呀!有緣既話!海邊見呀!!!(証實...經已傻左.....)

為你既遭遇感到不幸

都唔算係不幸既，至少可以感受一下果種比魚姦既感覺........真係唔試過都唔知....爽呀

C兄, 俾d心機, 我都係早排先至有第 1 hit 但係上唔到魚 , 不過感覺上已經好好玩
大家俾d心機再勤力d出動, 一定有回報

原帖由 arfly 於 2008-12-1 16:49 發表

                               
登錄/註冊後可看大圖

都唔算係不幸既，至少可以感受一下果種比魚姦既感覺........真係唔試過都唔知....爽呀

下次帶強勁d既架餐報仇咪得囉...鱸季流流長
d鱸實等你起既

係咖....唔中魚既一段日子真係幾灰咖..因為同埋朋友去玩，個個都叫我放棄，人人都上魚，不論大大細細...連魚毛仔都好..但唯獨我係全程白果+手軟.....但當佢地一知道我所中既目標就完全唔同睇法lu ，起初我真係覺得自己好似傻佬....日日係咁向住個海投假狗....又收又投....比人笑係在所難免....哈哈

師兄我都係新手ah@@
搵日一齊去玩na

加油比心機呀師兄!!今個鱸季實比你起到嘅

睇到都開心

條鱸中左打水~你應鬆少少線~唔係好易甩口~追魚果條應該唔係你中果條~亦唔會咁快去食魚仔住~起魚時~唔好以為鱸無餘力掙脫~見人係會爆住走~努力