我的投釣日誌(搞笑版)

見大家咁燥, 搵d野開心吓啦…
記住!!! 以下純粹老作, 如有雷同, 實屬不幸!!!!

[轉載自…….. 唔記得咗!!!]

2008年4月31日, 晴,

零晨2:59分, 我隻身搭巴士去到近期新發現嘅秘位 – 蚊洲!!!
請各位師兄唔好pm問我搭幾多號巴士去, 因為我應承咗友人,
我係唔會將呢個秘密, 講出去嘅!!!

未開竿之前, 首先講吓呢個秘位, 其實呢個位,
係我一位女性朋友, 係老虎個網度偷偷睇返嚟!!!
其實呢個位好臭, 好多人上嚟打誘餌, 又將d餌粉,
南極蝦, 垃圾…等等留低, 形成惡臭!!!
旁邊, 仲有幾條晒乾咗嘅死雞泡, 係度”嘔”緊蟲…
所以我好很肯定呢個秘位咁臭, 一定好少人嚟,
至於我, 身為一代打竿高手, 區區一d惡臭,
又點可以打擊到我對釣魚嘅熱誠呢!!!!

零晨3:01分, 經我詳細勘察地形後, 我終於打開我心愛嘅sureget竿袋,
拎出由一位老師傅專承為我打造嘅19呎遠投手竿,
而魚絞方面, 當然係選用s牌頂級stella加上2506杯,
魚絲方面, 為咗秘位打怪獸, 更打上浸泡過花生油嘅5號pe, 200m!!!
雖然網上流傳, pe必須浸泡過機油, 不過經我細心考慮之後,
決定浸泡花生油, 因為比較環保!!

穿好魚絲, 綁好2/0子彈鉛, 再落k牌0.8號腳線!
係呢度要同各位解釋吓, 小弟做個無數次實戰, 認為只有k牌0.8號腳線最得食!!
魚鈎方面, 當然係用史上最強嘅gama 1/0號粗骨泥鯭鈎啦,
此鈎鈎尖經特別處理, 十分銳利! 而鈎柄採用特別粗骨打造嘅,
包保中泥鯭嘅時候冇咁易直鈎!!
綁好釣組, 拎出秘餌, 係山崎買嘅龜包!!
將整個龜包上鈎, 之後吸一口氣, 從而達到冥想嘅狀態…….
跟手閉目養神, 等待爆光一刻, 又係最得食嘅時間!!

早上5:05分, 晨光開始由東方升起, 係呢個時候….
“喝!!!!” 我大喝一聲, 將釣組投向167米處,
我知道, 平常人係冇辦法投到咁遠嘅, 但係用師父打造嘅呢支超遠投手竿,
即使係投200米, 亦都不費吹灰之力!!! 但因為我知到167米外,
係一個沙地排底, 所以就不偏不倚地投到果個排口, 其實遠投一d都唔難,
難就難在, 控制距離, 小弟都係苦讀釣魚書十數載, 先至領悟出箇中奧妙!
其實係同所喝嘅聲線有關嘅… 至於係點喝, 恕小弟實在不便公開!!

都係講返167米外嘅事啦, 果然係爆光水, 一落餌就有料到, 竿頭微微一震,
我立即騎穩馬步, 準備抽竿!!! 可能我實在太心急嘅關係,
驚動咗想食餌嘅斑斑!!!
點解會知係斑斑? 透露少少啦, 其實係頭先竿頭微微一震嘅時候,
我就已經睇到佢嘅食餌方法!!
斑斑經我驚動之後, 就再唔敢試餌喇, 呢一刻, 經驗話俾我知,
我需要晃餌, 吸引斑斑嘅注意!!!
我立即想起係dvd裡面, 見到重見點暈先生嘅二段晃餌法,
但我並冇駛出嚟, 反而用咗佢另外一招, 之字型走法!!
果然之字走法係駛得嘅, 試想像吓………
一個山崎龜包, 係水面呈之字形咁”發”嚟”發”去, 何其壯觀呢!!
係呢個時候, 果然激發起條斑嘅略食性(predator), 一口搶埋嚟!!
我就揚竿作合!!! 中呀!!! 之後我都就咗好耐, 條斑終於係5:08分上水!!
條班足足有成30cm, 影咗相, 立即放生!!

咁啱5:30分有車, 立即執野走人!!!

雖然條班張相冇比例, 但係足30cm㗎!!!
[img]

                               
登錄/註冊後可看大圖

[/img]

頂~~為左睇你篇咁既野，搞到我冇得收工，差 d 笑到冇命，你好得閒咩，你冇野做咩~~~~扣你分架:%18^

king sir.............

king sir 你編野真係冇得頂~~~~~

king sir..利害呀 ..真係笑爆嘴

  愚弄網友！要扣分呀！ 版主.....

...3:01am - 5:05am..你就係咁揸住枝竿鈎住個包.."扎行馬"..企到晨光初露!?!?!...

[ 本帖最後由 panda 於 2008-5-30 17:54 編輯 ]

睇你篇野叉點死早唔知幾多年、快D比番D買厠紙錢我啞

你條"班" ......對眼"神華內憸" ......似係食過夜粥0波

而魚絞方面, 當然係選用s牌頂級stella加上2506杯,
魚絲方面, 為咗秘位打怪獸, 更打上浸泡過花生油嘅5號pe, 200m!!!
雖然網上流傳, pe必須浸泡過機油, 不過經我細心考慮之後,
決定浸泡花生油, 因為比較環保!!
SIR~~~你都吹到咁大~~~阿大師重邊有嘢講喎~~

[ 本帖最後由 松田先生 於 2008-5-29 19:11 編輯 ]