第一屆灘投公開賽決賽花絮

經過炎夏嘅三場賽事,今年第一次嘅灘投公開賽終於完成...
咁嘅天氣陽光下曝晒比賽
辛苦程度...真係...999.9千足純金啊
好多各位參加者,盡力抽時間參與,亦好盡力比賽
今次決賽我地去左老遠嘅大嶼山大浪灣,
又車又船再又船先可到達喺辛苦上又加左分,
眼見各位選手都好精神喎,尾場都應該鬥得好激烈,
當船漸漸接近釣點碼頭...咦...點解咁多人嘅??
原來有一大班人黎玩,都無所謂喇...一人一邊...
不過今次最衰嘅係...好多艇喺外面落網,
玩遠投就最怕遇到呢味野...大家唯有就住玩喇...

大家拿拿聲開竿後,大會工作人員一聲令下,
選手們即時鳥獸散馬上進佔有利位罝,
好快就有魚上釣,不過好多係外道...
大部份係雞泡同狗棍,大家真係好慘...斷左好多勾...
雖然係咁...大家都明白,魚係無罪的...
非常有品,即釣即放,並無刻意殺死佢地!!

其實今場賽事,目標魚沙鑽並唔係咁多,大家都唔介意...
最慘係落網嘅艇越來越多,越來越密,越來越近...
而且早過我地到果班人仲網埋一份...死未...
攪到好多人都掛網,損失唔少釣組天秤...
如果明年正式實施禁拖網我都唔知到時點釣!!

比賽後段好在天氣轉陰而且開始有少少風,
大家無咁辛苦,上半場真係好焗好辛苦,
小弟都頂唔順要落水降搵如果唔係...真係會死...
我地亦有擔心天氣會轉壞,
所以比賽時間只係定左兩個半小時,
比賽後,天氣狀況無變壞所以我地亦有時間輕鬆一吓!!

到左5點,大家就結束活動返長洲喇...
整體比賽氣氛好好大家好努力,獲獎嘅亦實至名歸,
吸引左今次經驗希望下一屆會辦得更好,
亦希望有更多釣友支持參加!!

今年比賽要特別感謝以下各位...
多謝天公做美,三場賽事,三個日子都配合...
Ricky兄,感謝你無私出任工作人員,有得睇無得玩...
Uncle,第一場多得你黎幫手...
然少,感謝你規劃整個賽事...
JI,多謝你決賽幫手,等我有機會抖抖...
多謝峰仔及強哥俾我去你地屋企沖個靚涼,
再多謝強哥晚飯嘅紅白酒,
仲有嘅係...因呀然少攞左決賽現金jetport,
佢又攞出來晚飯買海鮮食,所以又多謝佢一獲!!

比賽結果及頒獎相片,請睇頒獎專帖

想左幾年去呢個碼頭通頂都未行過添...

通頂！ 唔好呀！果度好猛...架！....

係咩果度好猛...  我去過幾次呀  無野呀

文字更新中
naobao 發表於 2011-7-11 19:48

                               
登錄/註冊後可看大圖

期待中