下星期就係臭系達人既大日子
梗係要去試試水溫啦
不過係試夜水!
人: 我、勝哥、杰師傅
開始既訊好一般無乜訊,換細標!
菲仔殺到...
中間中左條大頭, 控左3分鐘左右甩左,完全唔肯就範.....
最後上左
麥鯪 X 1
土鯪 X 1
塘虱仔 X 1
豬公仔 X 1
杰師傅中 大土鯪 X 1(堅係大條)
勝哥, 甩左條麥鯪,明啦
(咁樣夾埋,應該一個鐘就爆左150CM既標準 )
另外一個驚喜, 就係中到一條48CM羅菲!大到我同勝哥開頭都以為係鯉魚
但基於宜家開始,唔過50都唔影既標準...最後只係影左少少
今日馬田上身,加入迷幻攝影部隊
今次出POST,其實係想順便講下晌下游釣既小小個人意見
希望對其他新人有幫助, 因為我自己都係一步一步咁走過來,老手勿插
晌下游釣要睇流水
既然有流水
咁換句話講,用台釣法,其實一定程度上點都會有走水既情況出現( 走既快慢視當時水流緩急而定)
所以到時拋竿見到支標放飛機咁走唔好慘叫=__=冷靜D (當年對此本人都感到非常絕望)
魚種:
你講得出既淡水魚種都有
最多既肯定係羅菲, 其次係各種鯪,鯉魚,大頭,白鰱, 塘虱等等 (我中過拗頸, 白鱔等等...烏頭都有人中過,但呢D好少會上水)
大小由 樹葉、鑰匙扣到 80幾100以上都有,跨度大,所以要做起打怪獸既準備
補充一句, 下流魚不要吃, 除非你想死
竿長: 如果晌下游釣既, 大部分人都會用15尺手竿, 因為比12尺打得出D,迴旋範圍比12尺多, 又無18尺咁重
咁當然你可以選擇密密手玩12尺, 如果那天大開口的話,12尺會係一個打快魚既好選擇
亦有人會用18尺 (我), 隊出D總有好處,不過長期用18尺打密竿的話好累, 而且睇標都幾遠下, 唔習慣既新手三思
餌: 台釣用既粉餌味道分類離不開最常用既幾種:
麩、香、腥、肝、酸、臭
個人既見解係, 基於下游菲仔太多,狂起上黎都真係無乜計, 晌正常情況下唔好用太腥, 否則......
當然釣無定法,如果唔用腥時無訊或者訊弱,請自行判斷,酌量添加
而除左味型, 狀態亦係好重要既因素
一般有軟、硬、粘、散
個人習慣唔會開太散, 考慮到有流水,即使開散餌聚魚,其實個流都會慢慢帶走魚窩,倒不如開粘D,軟D, 軔D, 一來太散易俾菲仔搶晒,二來適口性會更好
如果無開慣魚餌,請參考魚餌包裝上既水比例,基本上每一包魚餌上都會寫的
咁可能你會問,咁我一次過溝幾種咁點解? 咁就要因地制宜,睇下自己想開咩狀態, 以最初階既黎講, 1 : 1 左右通常無死(只係通常狀況,請自行調教)
正常開餌, 其實唔洗太複雜, 一兩味,加少少狀態粉收一收就OK, 落太多沒什麼用, 俾著你,都唔會想食到舊野係乜味都有啦
標: 由於有雜魚同水流, 加上幾乎都係生口魚既關係
我個人會選擇比較大,吃鉛較多既浮標 ( 一般冬季用正常池釣標, 春秋用比釣水塘細一號, 夏天就會大標)
標最最正常分兩種最常見既標型
長身、棗核
長身到底快, 下游用會有優勢
棗核下降較慢, 主要釣行程, 兩者使用主要睇釣手習慣
調標,其實野釣可以唔洗太深究,網上有好多講解調標既奧妙,通常呢D都係FOR 正式比賽, 如果野釣,正常調幾釣幾都出到訊,
個人會調 5釣3, 調6釣4比較多
記住一樣野,由於會上流同落流, 打幾竿見到支標唔同左目數, 到咁上下, 請自己推高或拉低浮標
線號: 基本上落得下游都諗住打怪獸,而且 FOR新手黎講,用太幼線,斷既機率都幾高
所以我個人會用1.5主起步, 大多數時間用2號主, 2.5次之, 3號最少(3號都試過秒殺,吹漲)
當然高手們可以用1.5主以下,不過新手,還是粗一點好,到時斷線跑魚, 留下遺憾就唔好, 反正食到埋黎, 肯定睇到
抄魚, 最好由頭入, 由尾入好易跳番出黎 , 如果要報名參加抄魚訓練班課程, 請聯絡 ER007ER 
暫時係諗到咁多, 有D咩再補充, 如有錯誤或者意見, 歡迎交流!
以上資料只係好概括咁講, 係FOR新手作為一個最基礎對釣下游台釣既認識
都係果句,釣無定法,沒有標準, 上魚才是硬道理
|
[複製鏈接]
提升卡
置頂卡
沉默卡
喧囂卡
變色卡
千斤頂
顯身卡
樓主
