手竿釣魚038---又去左魚場到返

9月24日，原本請假去艇釣，可惜打風，攪手話要取消。
因為上次係大埔全日都係釣得三條魚，攪到而家有D唔舒服，
所以就諗住去好姐個場玩下，平衡一下心理。
魚餌用番上次冇乜點用過嘅死蝦和魚仔。

一早出門，由於路途遠，去到已經9點咁滯。
果陣時只得幾個人係到釣緊，好似包左個場釣咁！正！
立即開支18尺手竿+18尺6號尼龍主直出+6號千又勾，再加舊死蝦。
拋左兩三野，突然見腳前對出有條好似雨姐咁長嘅星鱸游過搵食。
咁咪試下拋舊餌係佢面前試下，睇下佢會唔會食埋黎囉！
點知佢抬一抬頭，口都唔見佢郁過，就真係食左埋黎。
咁就緊係頂佢啦！可能有上次炸竿嘅陰暗，今次見條鱸仲大過上次，
頂左兩三野，就跟住佢兩邊走，好彩係我包左個場，可以慢慢同佢玩過。
有轉發比佢走入水車底，條絲仲比駕車kick住，
心諗唔好斷丫，咁難得第一條咁大碌！
不過又好似拉佢唔住，炸左就死得，因為冇第二支咁長嘅手竿啦！
係呢個時候，左手邊遠處有位師兄係開緊竿，講：嘩！玩手竿噃……
心諗真係好想叫救命！搵佢過黎幫手撈條魚上黎。
唯有頂下，拉下，支持住，好彩條鱸開始冇乜力，其實我都係。
咁樣先可以慢慢拉佢埋黎腳邊，抬高佢個頭吸下氣。
係又拉下，又走下，幾輪之下，終於用撈箕撈左條鱸上水。
得左啦！有救啦！可以抖下囉！
由於冇帶尺，只係用魚拑磅過，大約有7kg重。
返到屋企度下張相，條魚鱸大約有1米咁長，破左我手竿釣魚嘅紀錄。
可惜只係係魚場先比我遇到咁大條魚丫。

之後，靜晒。又係四圍搵魚釣。
望過去左手邊果位師兄，不時抽竿上魚，就走過去八下，吹下水，睇下人地點釣先。
去到睇，原來佢玩15尺中通竿（用手竿改成嘅，因為隻攪係竿尾），加淡水長標，
好似人地玩淡水台釣咁。後尾講開，佢以前真係玩淡水台釣嘅。
加隻攪黎應付D大魚嘅！
由於佢用粉餌，口餌又唔係好大，再加上用台釣，真係好易得手。
密密抽竿，都上左好多魚下。
所以立刻改釣組。18尺4號尼龍加+火車龍+6號千又勾+兩粒最細嘅夾鉛，
再勾一粒蝦肉，啱啱大過隻勾小小。較好釣5，6尺水到，一拋同我落水啦！
一落水D火車好慢，好慢咁沉落去，最後有三粒入左水，三粒係水面，得左。
睇見D火車慢入水，最尾果粒都入埋，一抽，又得左。
兩三下手勢就上左條魚啦！
魚場D魚應該比人釣得多，學精晒。大魚又好，細魚又好都細細力食，“妹下，妹下”咁！
所以，後尾一見水上面第一粒火車入水就抽佢囉！唔係好易會入扣。
用細粒死蝦釣左幾條後，又靜晒，可能食厭左。
又係要轉魚餌嘅時候，用死魚一落又得，又上幾條。
見都釣到幾條魚仔，心理好係調理左，
所以就轉玩12尺手竿+12尺4號+7號伊勢尼，都係細蝦餌玩下。
用幼竿又短，都中左幾條好正！
用黎釣星鱸，手感十足。
總之秘訣係：轉餌，轉位，四圍搵魚釣。

期間有一口用4號嘅時候，口餌一落到水面就中左條紅鮋，唔駛十秒就上水。
另外有一口，條魚一食埋黎，只係感覺到佢食，唔駛一秒就拉斷左。
仲有一口好特別，係隔離有位師兄用手絲釣到一條紅鮋，佢一路收，條魚一路走。
點知條魚仲可以過黎食埋我口餌先上水。佢真係好貪食。

由於佢用南極蝦，時不時會拋D落去會吸引到D魚埋黎。
期間，見到D星鱸成群結隊游埋黎食餌，好近岸邊好淺水，都唔驚人。

當日總共釣到廿條魚到，好似幾多，但唔密口。
叫做可以平衡一下心理啦！

C兄丫@@果到俾玩假餌？

我都係去玩手竿，中烏頭或黃鱲倉飛來飛去極好玩但易斷，另外係好多師兄去玩假餌的

條魚個口究竟發生咩咩事？？

WoodyWu03 發表於 27/9/2013 01:27
條魚個口究竟發生咩咩事？？

佢個下巴中間個位斷左。
另外有條個下巴冇左。
去魚場嘅師兄要小心，唔好整傷d魚。

benzene 發表於 26/9/2013 23:56
我都係去玩手竿，中烏頭或黃鱲倉飛來飛去極好玩但易斷，另外係好多師兄去玩假餌的 ...

玩手竿真係好正！
請問師兄，用乜野餌同釣組可以釣到烏頭同黃鱲倉？
因為我都未試過上到佢地。

重點是白色,釣中上層飄浮,蝦肉和南極蝦也可以,
我上次由斷絲到斷竿,我相信你一下拉斷的鯧鯧~~
另最好少人先玩,因為以上魚種都愛頭搖又尾擺。

另外,師兄度魚盡量不要放沙地,請在桌面上進行,因沙地一樣很傷魚……

用面包可以釣到烏頭同黃鱲倉！

7KG
勁多魚
開心死啦