手竿釣魚040---手竿改前打

話說舊年同個師兄買左支12尺並繼手竿（仙竹）之後，

又上網買埋隻前打攪（蟻王ALC 7/8）就立即開工改竿。

係舊年假期去左梅窩放假，順便就試下支竿。

兩日都係用青虫試釣，釣左十條石九同泥猛到。

雖然竿頭有1.3mm咁粗，唔會比魚仔咁易就拉攣，

但竿身都比較軟，所以都好易感覺到細薇嘅魚訊。

可能係玩得手竿多，訓練到感覺都好強下。

可惜果到冇大魚未能試到支竿嘅腰力如何！

1月7日（星期二）死流嘅日子，有時間就出去散下心啦！

順便走去試再試真d支前打竿先。

以前每次出去釣魚都買一両生蝦，

但打龜實在太耐，天氣又凍，魚又真係好少。

所以最近都買四五隻，今晚就買四隻玩下算。

由於今次主攻試前打竿，去左有線對出嘅渠口位，貪果到有好長嘅直壆。

六點半到釣到七點半，一口魚訊都冇。

只有魷魚埋黎食我隻蝦，因為當時同兩位師兄吹緊水，

剩係睇到竿頭比拉下拉下咁，一揪就冇左第一隻蝦了。

跟著，果兩位師兄睇我支竿好特別，就開始左一陣交流，

其實係我跟佢地學野先真，獲益良多。

之後，又再勾第二隻蝦落水，聽師兄講最多用到3B夾鉛，訓練一下自己。

由直壆頭走到中間，見冇乜時間，又走番轉頭，都係一口魚訊都冇。

趁仲有半個鐘，因為想八點半走，立即去碼頭碰碰運氣。

去到將隻死蝦拋落去碼頭邊，攪左一陣，又係冇動靜。

緊係啦！死蝦我都唔食啦！既然仲有大把，一於換過隻生嘅！

隻生蝦一落水，就有隻艇仔埋岸，起初都唔為意，

點解隻蝦會識得避開隻艇仔，走入碼頭底嘅！

輕輕一抽，原來中左魚先真。

由於支竿都好軟下，加上條魚都唔係太細條，都同佢玩左一陣。

佢一開車，支竿就飲水。佢一冇力，就用支竿彈番佢上水面。

因為太耐冇中魚，又心急拉佢上黎。因為2號尼龍直出，又驚會斷絲，唔感玩太耐。

個撈箕一落去撈佢，就比佢走左。一時真係有d手忙腳亂。

撈左四五次，佢又冲左一輪，終於攰囉！一撈就慢慢收番條魚上水。

拿拿林，用埋最後一隻蝦，係碼頭左手邊一落就掛底，隻蝦葬身大海斷絲收場。

咁就結束左今晚嘅行程。支新竿的確唔錯，好有手感，下次中魚可以再玩耐d先上水。

師兄好波 連改竿都會

神原優月 發表於 8/1/2014 22:09
師兄好波 連改竿都會

多謝!!
魚仔一條姐!! 都唔及師兄嘅立魚利害!

其實前打會好辛苦嗎? 我見D師兄都背上好多野 釣2下就換位

嘻嘻,支竿果然冇搵錯主人,發揮得淋漓盡致,以前拎黎釣淡我大餅少少既羅非都怕炸

到你身上終於發揮到佢既實力!!好野!!~tyjp-3-10^

神原優月 發表於 8/1/2014 22:29
其實前打會好辛苦嗎? 我見D師兄都背上好多野 釣2下就換位

唔辛苦... ... 點會釣到魚呢!!
手竿, 前打都係釣腳邊, 要有魚就一定要四圍走, 四圍搵魚.
有魚都唔係好辛苦姐!!

jwai 發表於 8/1/2014 22:32
嘻嘻,支竿果然冇搵錯主人,發揮得淋漓盡致,以前拎黎釣淡我大餅少少既羅非都怕炸

到你身上終於發揮到佢既實 ...

多謝！！
支竿仲未試真，搵日再試下．

恭喜恭喜。赞啊

ck辉 發表於 8/1/2014 23:50
恭喜恭喜。赞啊

多謝。

4隻蝦都買到？我真系無諗過…怕比人..小  哈哈