為左個海，你可以去到幾盡？

因工作繁忙，好耐冇釣，又好耐冇上來，睇返好多POST，知道依家釣況越來越差，所以有感而發...

我係一個熱愛海洋既人，同大家一樣咁爛釣，仲好中意水上活動！
雖然我唔敢響個釣魚網站宣揚咩環保咩.，好似自打咀巴咁，但真係唔講唔得，心裡面過唔到自己...
唔想自己對個海好似蝗蟲對我地咁，所以就算俾人鬧我都要講下，唔係個心會好唔舒服，願諒我吧！

其實講.問題已經唔係依家先講，響中國地區人既文化問題，教育少、環保意識低，人自私就會係咁
人類破壞環境既速度遠遠超乎想象，其實破壞一個好的釣場真係唔需要好耐，只需兩年內果一區內一定滅族。

以下係我親身經歷：
我喜歡玩EGI，就好似以前我去開既主場咁，行程順住去，FIT住等頭班船，又FIT到尾班船走，再FIT到尾班車出去，食完野再行出碼頭FIT到尾班車，
個個位都有得FIT，仲FIT親都有，包括我自己，因為唔識.、自私、貪心，爆釣幾多就帶走幾多，見人地係咁，自己又有樣學樣，
情願派俾人、打丸雪冰箱慢慢食或者留返做餌釣斑都唔會放返落海，就係咁一季、兩季、三季之後，已經次次打龜......
一來個場已經通哂天，二來從來未見過有識人放生（包括釣魚），依家個場已經死左好耐，只係間中響D繩邊見到一兩隻手指B出現下，
以前係三四十隻咁出現，嚇下佢地一齊噴墨都不知幾得意，
依家先識後悔了、心痛了，但已經太遲了.....

後來見有人話個場俾人放左網，話因為咁而滅族，其實唔係網魚網魷魚，而係想網我地D餌木，
當地漁民想我地知道，我地澈底咁破壞左果區生態，想我地停手。
點解我會咁講？係因為我親耳聽到的，主場係一個小漁村，有時走去D靚位會打擾到D原住民老人家，
有時我自己一個去釣，都會帶D生果或其它手信請下D公公婆婆食，話哂都係打擾到人地住既地方，友善D禮貌D係要既，
漸漸熟落了有時更會俾我直接在屋內碼頭仔釣，甚至帶我出去BOAT GAME一陣，節日慶典又會請埋我一齊玩，仲借地方俾我過夜，又送下D特產俾我
直至有次我爆釣，冰箱裝唔哂諗住分D俾佢地，點知佢地每一個都面有難色地收了，同平時熱情親切既態度完全唔同，初時我都冇為意，
但過左一排再去，D公公婆婆已經好似唔認得我，如常地同佢地打招呼已經唔睬我仲帶點討厭我咁，
我聽到其中一位婆婆帶點口音喃喃自語地鬧：你地D人成日入來釣哂D大尾魷，搞到我地乜都冇啦，乜都"太"唔到FAN來，食屎囉，快D走啦！見到你D釣魚人就僧！
跟住就走去拜神，求神明賜魚獲俾返佢地，我聽完佢咁講覺得好難受，個心好痛忍唔住流下淚來收杆離開，唔係因為婆婆鬧我，
而係因為我知道自己有份破壞左我最愛既海洋生態，等船時有位認得我既叔叔見我眼紅紅咁望住個海飲泣埋黎睇下我，
從佢口中得知原來自從多左人來FIT魷之後，果一帶D漁獲都越來越少，可能係因為我地破壞左果區既食物鏈，
所以有D常見既魚種都減少左好多，村長已經開過好幾次會要想辦法唔俾人入來釣，也嘗試過寫信去漁護署。
自此我就好少再去果度，一年最多去兩三次，但已經次次打龜，而且附近都放左好多爛網響底，又加左好奇怪的繩擋住你D餌木拋投。

為左大家個海，你可以去到幾盡？


以我自己為例，經過以上既教訓，先識得開始保護海洋，係保護我同大家既釣場！
其實每人行多步，做多少少野，教育下其他人，咁樣我地D釣場先有得救，先有得長釣長有，
好似廿年前我讀緊中學既時候，一放學就走去爆叔屋企樓下碼頭釣魚，買套120蚊連隻膠攪仔同紅白浮波加盒鉤果D套裝就去釣，
都不知幾多魚，我等一次炸竿仲會好開心就係果度依家起左酒店式豪宅果塊空地上條斤頭黃立倉，
依家全日都唔知有冇兩條長過過手指，五次都可能有一兩次大過手掌既......

所以依家我只能以身體力行，為大家既釣場出一點點力，起碼老左退休都有得釣下魚，唔駛自己老左響只識去公園同其它伯伯玩三國殺，
我唔係叫大家唔好釣，而係學下澳洲咁樣.就住黎釣，要帶走食或者養都盡量留下手唔應該攞太多或太細，
響香港咁複雜環境既海底，細魚要成長到變大魚已經好困難，適合外來魚入來產卵既地方已經少之有少，
如果我地再連細魚都唔放過，入港產卵季節又濫捕的話，好快我地個海港就會冇魚釣.....老泥都唔多條既時候大家仲有咩好玩？
真係只用手機釣魚抽五星竿會過癮過真係對住你熱愛既海洋？？？


我通常最睇唔過眼係會教育果D一家大細同初學過手癮既釣友，一般都係禮貌地勸告，仲試過差D同人大打出手，但我都覺得值得，
不論我係咪釣緊魚都會行埋去講，但首先自己要有好好EQ，因為十次有九次都俾人媽媽聲的，一D都唔好受。

終於呻完了....今晚應該訓得著
想插既隨便插，想讚既落力D，最好同我一齊身體力行保護我地既釣場啦！
多謝各位

多謝分享
我都有比自己1個限額 細魚放生 大魚3~2條就夠

支持

C兄心情我好明白，每次出礁實打鼀，唔只係我仲有落綱既魚民同一班潛水佬，每次我都會自問，吓呢到都冇魚，，，，

我都支持放生，魷魚呢年真係少到好似絕左種咁，耐唔耐見人出boat game 相，心都離一離，佢地咁搞，怪唔知得無啦，個邊邊又落網，有d釣魚人又大小通殺，魚仔都無埋，個海唔死等幾時，我唔會叫人放生，做好自己好過

支持

天鷹仔 發表於 19/6/2014 07:29
我都支持放生，魷魚呢年真係少到好似絕左種咁，耐唔耐見人出boat game 相，心都離一離，佢地咁搞，怪唔知得 ...

BOAT GAME我冇乜意見，講真要食真係食唔到咁多，雪過又唔好食既
現在我通常會限自己1-2隻筒有手掌大的即場刺身或整SUSHI，係最好食的
帶走都只限3隻以內大過手掌的，見到有卵的即放
因為留意到有卵的魷魚通常都一對對的出現，所以快快放返俾佢地交配生bb

非常讚成師兄做法..
我都係兩條魚就算...
打龜就早d收檔執下垃圾..

師兄，你講到有血有淚

naobao 發表於 19/6/2014 13:52
師兄，你講到有血有淚

有淚姐，冇見血
婆婆鬧完果下個心真係好唔舒服...