6/12 錦鯉樂園：泥足深陷

雖然搵到新錦鯉樂園，但始終新不如舊，上星期六心思思，又走去返錦鯉樂園。從未見過樂園咁少水！所有舊釣位都變哂在山頂，而壩附近斜坡太斜，所以過了壩去對面找新位。

將近釣位，行過一塊平地，點知泥土太濕太軟，兩隻腳陷入泥中，褲腳都插左入去，跟著人都趺低埋！企返起身，兩隻手都係泥，兩隻腳插左入泥地，點都拔唔到出黎。好彩我有塊膠布，出門又攞左份報紙。將佢地鋪落地，放低個袋，坐係上面，借力拔返隻左腳出來，但係右腳都係拔唔出。無計可施之下，唯有伸手入泥裡面，除左隻鞋，終於拔返隻右腳出來，之後仲要徒手發掘隻鞋。脫身之後，鞋已經著唔到，雙手雙腳都係泥，唯有就咁唔著鞋，行返轉頭，繞道再去釣位。


到達釣位，坐定定，因為泥太濕，落唔到水邊，唯有用撈箕加塊布續少攞水，先清潔對手，再SET竿，跟著清潔對腳、洗襪，但係鞋就洗唔到，因為泥太多而水太少。


好彩終於釣返一條40CM黑色錦鯉，唔駛白行一趟，另有非仔、網紋仔約廿條。


回家前去燒烤場洗手間洗完鞋先走得，返屋企之後又花了幾粒鐘清潔善後，真慘！



塘尾已經乾唒

塘中間都乾埋

只係得壩下面仲有水


40CM黑白錦鯉

得返一成水…………條錦鯉好靚吖

嘩, 咁少水, 我諗起碼晒返二星期D 泥先實....
錦鯉樂園真係死到直.

多謝MICRO 兄深入險環為大家實地報導....

聽講係因為有工程，所以放咁多水。
希望今年冬天不太冷。主場試過因為工程放到霸下得幾呎水，結果凍死左好多魚，成個主場臭氣沖天，食環署要派人執死魚，執左十幾袋。

多謝分享！
師兄，小心！

micro62 發表於 8/12/2014 22:33
聽講係因為有工程，所以放咁多水。
希望今年冬天不太冷。主場試過因為工程放到霸下得幾呎水，結果凍死左好 ...

咁講法，今年都唔使指意去了。

skycat772 發表於 9/12/2014 06:31
咁講法，今年都唔使指意去了。

D魚係咪會集中D？？

魚密度會係超高。水退定後，應該好好釣。但跟住幾年就可以收得工。

自從主埸幾乎乾塘之後，龍蝦數量大降，已經釣唔到大隻龍蝦。如果連龍蝦樂園都毀滅埋，以後就泡製唔到「蒜茸開邊蒸龍蝦」。

亞昌 發表於 9/12/2014 09:31
D魚係咪會集中D？？

到時我地落水捉。一定爆捉，哈哈

micro62 發表於 9/12/2014 09:53
魚密度會係超高。水退定後，應該好好釣。但跟住幾年就可以收得工。

自從主埸幾乎乾塘之後，龍蝦數量大降， ...

即係殺雞取卵，以後又小個地方去。