拖假餌061---水盡鱸飛

拖假餌061---水盡鱸飛
日期：2015-3-25
時間：1745-2000
流水：生流，水退1-0.5m，右向左流，到左7點九到停流
假餌：七彩慢沉米諾
釣具：8尺橫攪路亞竿
釣場：石壆腳邊
手法：慢拖均速
中魚時間：1850入黑後
其實，今次係想試下新買果支10尺假餌竿，同埋個diy撈箕腰掛嘅!
因為知道今日只有個零鐘頭時間有流，同埋可能會落雨。
所以都係放棄唔試竿，只係試下個撈箕腰掛得唔得，咁就可以盡情拖魚就得。
開頭個腰掛真係好方便，唔會好似打斜咩咁，會跌埋一面。
但後來發覺個背囊頂住個撈箕個框，真係有d唔習慣，希望下次可以改善一下。

講番今次行程，都係一去到就去左最出嘅灣位，情形同上次差唔多。
流水右至左流，有魚仔，不過只係見過一次打水咁大把。
拖左一陣，估計都同上次一樣，都係走為上著。
跟住去左渠口左邊，係渠口已經有六個人係到釣緊，打沉底同釣腳邊都有。
咁就係右邊拖幾槍，觀察一下環境先。
情況同先前一樣，我諗都黑齊咁濟，不如再向前行去內灣位試下。
去到打幾槍，隔離位師兄用竿釣腳邊中左條尺零百花鱸。
本來問佢駛唔駛幫手撈條鱸上黎，點知佢攪一陣就抖左條魚上水。
跟住冇耐，係佢出面嘅石位打左兩次水，仲鬼死咁大水花。
打嘅時候仲見到條魚嘅身影，真係令人興奮！
終於係努力轉左幾次假餌之後，拋出石邊拖兩拖就中左條尺零花鱸上黎！
原來，咁細條花鱸都打水打到咁大水花嘅！仲以為好大添！
可能今晚d鱸食飽左定畀人拖晒，抑或停左流，之後一條鱸打水都冇回復平靜。
見冇流又冇魚打水，睇黎今晚都可以收工！
於是行去渠口吹下水，順便八卦下。
行到去見渠口下面，一大個黑球，成群魚仔。
見呀大叔用個撈箕仔一撈，都撈左幾兩上水。佢話用黎釣石九好得食喎！

總結今次行程：
要拖鱸，一定要有流，同魚仔。要留意有冇石堆。
對以後手竿掃壆又多左好多寶貴嘅資料，等我下次又帶埋支手竿去玩下先！
另外，第二晚同一位有聽講有…………等我下次再去證實一下！

隨後補相！