南油開季之章雄不要來

siuwah4 · 發表於 29/3/2015 01:42:42

本帖最後由 siuwah4 於 29/3/2015 07:38 編輯

3月15日晚再跟舅父出南油, 唔似慣常行程釣一陣大火船, 第一站直達冇頭井, 時間大約 16號上午十一點, 拿拿臨執齊架生落艇仔搏頭水斑, 同艇釣友其中一人就係南油名人 b95x8, 因此令我感到相當大壓力, 話晒我都叫做業餘刀手, 如果釣輸都幾冇面. 終於開波埋井綁繩定位, 一落絲就有魚咬餌, 上到魚與斷絲只係一線之差, 結果同名人釣到的石斑條數差不多, 鬆了一口氣, 但釣友靳能兄正在釣緊魚, 錯過拍攝攞石斑上大船的短片, 非常可惜.

食完晚飯再落艇仔埋樁, 石斑消失了, 釣到的差不多都是章雄, 玩就好玩, 但食味與價值, 總是懷念日水的石斑, 釣到唔願釣, 凌晨三點已返上船, 留力明日再戰, 問船上釣友釣到乜, 答案清一色章雄, 好多釣友都係釣到唔願釣, 有釣友覺得冇驚喜, 兩點幾已入房瞓覺, 其實釣魚佬都幾難服侍, 爆釣時又嫌冇挑戰性, 冇魚咬餌又話悶.

17號清晨轉井, 目的地係八支樁, 由於已有一隻船喺八支樁, 舅父決定改去中井, 但見有拖船, 未能埋井, 拖船走咗釣一陣中井, 冇魚上釣, 起錨轉返去八支樁, 可釣魚時已接近黃昏, 再加上啲魚唔肯開口, 所以魚獲不及第一日咁多, 入夜我再落艇仔, 希望釣到其他魚種啦, 中魚睇見電絞上魚時出 drag 的力度不同, 應該唔似章雄, 哈哈 .... 紅色魚, 紅鮪呀, 幾個鐘釣到十條紅鮪, 一條牛廣, 收夠籌喇, 18號凌晨一點返上船預備回航, 總結今水我釣到石斑, 紅鮪, 慒仔, 海狼, 牛廣, 章雄, 2015年有一個好開始.