試新場有驚喜

好耐無出動我部慾火戰車了
皆因要試新釣場,小弟終於再度出洞

呢個就係位於天水圍嘅新釣場,
行過去一睇...周圍仲係建設中喎
唯有小心D行喇,見塘中有條浮橋,
原來塘主安排所有釣位都係喺浮橋上面,
完成後會有三條嘅
至於塘邊就不設釣位,好似有D可惜
講多小小釣場環境...
我見塘後面有唔少平整好嘅空地,
相信塘主會攪埋其他活動項目,
都好嘅,靠我地班釣魚佬果一佰幾拾點頂呀
我諗到左6月開張果陣,
成個場整理好,應該都好舒服!!

講吓釣魚嘅情況喇,
呢個塘原本係養魚的,
老塘留低左唔少白鯽,
加埋新塘主加放嘅羅菲及鯇魚,
都有一定魚量,
不過新魚好似仲未太適應,
食得好輕口,但係中左之後嘅力水好勁,有驚喜
最令我地驚喜嘅係...白鯽呀!!
好肯開口,狀態又靚!!
令到我地幾個釣得好開心啊!!
D信仲明顯過D新水羅菲
我地即刻覺得呢度可以攪吓蝦竿賽,
不過星期一釣完,
場主會封塘直至6月先至正式開張,
咁我地唯有等開張後再正式玩一次蝦竿,實地考察一吓

呢個場對我黎講係交通較方便及較多坐車選擇,
由九龍坐西鐵轉輕鐵又得,
坐巴士到大欖轉車站轉車又得,
到站後行到釣場都只係十多分鐘,
呢一點我好欣賞

多謝分享！

唔知，遲下有冇更多有關魚場嘅消息呢？

好似好過癮喔！