在「紅」海遇見撒旦！！！

話說前排至到近來，個海紅了，幾次釣獲也是狗來狗去...
最好一次便是一條唔知攞境定贈慶的紅魚……仔..........
直至前幾日的一個晚上……

本身諗住上半夜沉底遠投攪沙鑽，費事又石狗，最多咪龜都唔想釣石狗....
點知又有沙鑽喎，而且size 唔錯.....

本人釣沙鑽（特別係夜晚）（因為用兩個鉤或以上且用天坪）
習慣拋去流尾等釣組到底能夠被水流拉直，無魚咬拖幾下，
再無魚咬就掛機放噹噹，或者直接收緊後放噹噹，
之後空番隻手玩下其他釣法（個人爛玩之故）。

打沉底釣咗幾條沙鑽，
前打又中幾條石狗（話就話唔攪石狗，最後忍唔到想睇下腳邊有咩料到就被迫中幾條），
之後疏口，突然噹噹連續拉扯式咁嚮，
「巨鑽！？」是我當刻所想，即刻噹噹都唔除抽下佢，
唔抽由自可，一抽感到好似中魚網般但會郁的力量，
我下意識即刻一路收一路跑出碼頭最出面（因為我之前係碼頭中後段度拋竿係碼頭嘅點半鐘順流方向有成5、60米），
知道對方唔野少，怕佢向左游爆，就算唔斷最怕掛咗係碼頭蠔殼度最後都會斷，
如是者，去到碼頭出面，對手好似隻牛咁係出面衝，支灘投竿出現前所未見的弧度，
我承受着彷彿筏仔中紅鮪再x3的力量，
而此時望著望著竿頭嘅噹噹，生怕被魚絲掛到，此時我用最快的速度除咗佢，
正當我諗可以盡情無顧慮地享受上魚快感……噢！no!
「唔通一路都係中魚網！？」
「但係剛才係有魚咬個喎？」
「唔通中咗魚後被魚網卡住咗？」
正疑惑間，魚竿突然又出現番拉力，woo，正呀喂！
我當然立即抽起佢上嚟再收啦。
但條魚也有番咁上下，帶着好大的水阻以及力量作回應，
由於用緊嘅攪係灘投攪（無磅頂，主：0.8pe，子：1.2），本身已經有隨時會斷的覺悟了，
當佢爆時用竿的弧度化解佢嘅力量，當佢稍為無咩力時就扯起支竿再追絲，
如是者去到離腳邊差不多一竿位，佢彷彿見到碼頭的燈光，作出最後的掙扎像大石班般往下衝呀衝，此刻除了魚竿悲鳴著之外，我的手也悲鳴着，因為己經玩咗3分幾鐘有多了，
3分幾鐘舉鐵已經夠累了，3分幾鐘舉一條會動的鐵就累上加累，
但當時戰鬥緊沒有想到咁多，起碼要佢浦下頭知道佢係咩（其實當時大嘅估到佢係咩，雖然我未釣過），
暴力扯佢去到水面，果然係一餅野！！一條浦魚終於浦頭，
但佢又發力往下潛，又要我享受多十幾秒的硬頂，
終於佢也到水面了，等佢呼吸多幾淡新鮮空氣先，
既然仲未斷，咁就一不做二不休，上埋佢影佢相！！
但係我嗰撈磯係之前個位喎，碼頭得我一個，唯有將佢拖多十幾米啦……
拖番之前個位，俾佢吸得太多新鮮空氣了，俾佢回氣之下又要我玩多廿零秒……
終於又控制住佢，一手揸竿控魚，一手拎網撈，再加上之前消耗了不少體能，第一果然撈唔到，只碰到佢一下，而這一下又嚇親佢，又要再嘆下魚……
結果撈咗幾下，終於撈到佢（其實嗰網不太夠大）……










佢條尾刺好恐怖……

影完相諗住用個網網番起佢放咗佢，佢即刻好似蠍子咁向上刺（好在係刺到嗰網）

而且刺得好入，我拎起個網都唔甩，直接放係水度fing幾fing先甩……

之後地雷捕獲一條傻佬，

臨天光前打中咗口黃老太，

雖然呢兩條也好，但相對之前條魔鬼仔，已經不足為論了。

從文章中感覺到師兄個份喜悅，恭喜恭喜

多謝分享!
睇完個報告，好似自己釣左一樣!
過足有癮!

恭喜恭喜,過足癮