自製避風塘炒蟹

材料：
肉蟹一大只(最少一斤)

蒜頭一個(肉蒜)或獨子蒜五粒
指天椒三只
肉薑一舊(約莫乒乓波搕j)
蔥二兩

醬汁：
鹽半兩(約半茶匙)
糖二兩(約兩茶匙)
雞粉適量
糊椒粉適量
蠔油兩滴(大大滴)
老抽三滴(大大滴)
生抽四滴(大大滴)
生粉適量(唔好比咁多)
廚酒適量
麻油適量

將所有醬汁加入一只飯碗內，加水至2/3滿(呢個份量，已經多次驗証，千祈唔好手多多啊)，搞勻備用。

A、前期做法：
1、將蟹起蓋洗凈
2、將蟹肉剁至適當大小備用
3、將蒜頭拍扁起肉，加入指天椒一齊剁成茸備用
4、將肉薑去皮切片(不能太薄)備用
5、將蔥去表皮切道備用

B、處理蟹肉：
1、開火燒紅鑊至起微煙
2、加入花生油——最好用花生油，因為炸野比較好用，如改用時興既粟米油或芥花籽油或橄欖油會比較容易炸「窿」及粘底——份量大約兩飯碗
3、繼續燒紅鑊油，直至油表面出現微煙同出現「對流現像」，即係代表油溫夠高——如果想油溫更快達到標準，最好上蓋一陣——正常來講，油溫必須及至180-200度或以上炸野先會靚，如果唔係，就會出現「被炸物」索油現像，咁就大大鑊(唔好食是也)
4、當油溫夠高，續次放入蟹鉗、蟹蓋、蟹身，炸至金黃色並感覺夠干水，即撈起備用。

C、處理蒜茸
1、當炸好蟹肉並撈起後，大部份油盛起備用(以後炒菜用油)，剩翻少少，繼續慢火燒
2、唔好等只鑊出煙，馬上續次加入指天椒同蒜茸——一定要先放指天椒、後放蒜茸，因為蒜茸容易炸「窿」
3、慢慢搞D蒜茸，直至大部份出現金黃色，熄火，繼續搞
4、當所有蒜茸變成金黃色，上碟備用

D、合成大法！
1、開火燒紅只鑊(當然係洗過之後啦)，起微煙，落油(可以用返D舊油，唔好浪費！)。
2、至油起微煙，先落薑片，剷兩剷——所有薑片都炒過晒，跟住落蔥道爆鑊
3、落蟹肉，再剷幾剷
4、落醬汁，再剷幾剷，上鑊蓋
5、當醬汁開始收干水，再起勢係咁剷，剷到幾乎干晒水
6、最後落炸好左既黃金蒜，剷兩剷(真係剷兩野就好啦！)，收火，上碟食得！

要訣：
1、黃金蒜一定唔可以「窿」，唔係就會味苦——炸蒜茸既時候，千祈唔好等所有蒜茸變金黃色先收火(呢個幾乎無可能，除非用專業炸爐)，而係大部份變金黃色就要收火，等餘溫繼續將其餘蒜茸變成金黃色，如果唔係，最後結果必然係有部份蒜茸會變「窿」左。
2、炸蟹肉既油溫一定要高，如果唔係，蟹肉就會感覺「發霉」一樣，唔夠爽口(食落去可以感覺得到一梳梳蟹肉)。
3、落黃金蒜既時間一定要「最後」，唔可以太耐時間，如果唔係，一樣會苦！而且會吸走晒D醬汁，唔好食。
4、最後既「合成大法」，整個過程唔會超過五分鐘，千祈唔好過時喎，如果夠鐘重係「水汪汪」，咁就代表係失敗之作囉。