可以唔同意做法,但需要知道睇法
各位,
由依家開始,我會不定期出有關網站管理員嘅工作報告,事因小弟平時都會收到不少網友查詢,投訴及意見,有D係通過PM,帖內或見面收集返黎,我相信統一通過工作報告俾各位了解係比較好嘅方法,不過我強調,為保障及尊重個人私隱,此份工作報告並不會將所有反映意見人士,有關其身份資料及任何型式原文照登,只會以同類問題集合一齊作回應,以下紅字部份係屬於問題及意見,往後亦十分歡迎任何網友通過任何渠道,對魚樂網提供任何查詢,投訴及意見,
關於禁止回應保育放生意見
相信各位都知道,最近網內不同地方都加上Banner禁止於他人帖內批評魚獲,鼓吹保育放生等意見,而且更會禁言處理,此安排主要為減少帖內爭拗,雖然有不少網友反映罰則過重,而且所講亦係事實,我本人係十分同意,但現實經驗話俾我地知道,無論之前做左幾多工夫,如何解釋,總係有部份人士不理勸告,而且網上世界,多重身份,根本控制不少,此點為我地管理上嘅現實難處,不及時處理,惹來諸多不滿,有一個事實大家要明白及接受,太多此類批評聲音,網友分享意欲一定減低,到最後只有三輸局面!!
我不要求各位包容,只想將現實情況話俾大家知,況且保育對我地人類黎講,談何容易,我經常都在帖內問人有乜資格講保育,並唔係話隨意大人,叫人收聲!!
坦白講,就算全世界果D甚麼環保組織人士都無資格講,要過文明生活,就已經影響左大自然,邊個無製造過生活污水??邊個無排放過有害物質??邊個去釣魚無留低過任何不屬於海洋嘅野??我地依家做嘅任何事都只係補救唔係保育,隨意批評他人就等於五十步笑百步!!
帖內討論商業服務問題
有關呢類內容,本網立場其實之前已講過好多次,不過今次工作報告個次序要改一改,為以正視聽,我想先由本網商業立場去講,可以為各位網友提供免費及合理質素網上平台服務,一直以黎都係我嘅堅持嘅目標,坦白講,呢類討論對本網經營係會構成影響,明人亦不講暗話,如果有任何網友覺得自己係有呢方面嘅需要,好歡迎去搵一個任意俾你講嘅地方,呢點係個人自由,我好尊重!!喺任何資源都需要錢嘅世界,唔駛食飯亦無人會去打工受氣,小弟亦唔覺得有乜野問題,當然清高人士大有人在,本網亦曾受某釣會網內清高人士隨意批評,不過唔緊要,用時間就可以證明一切,只要係對嘅小弟一定堅持!!
另外嘅原因就係關於可能導致抹黑或宣傳問題,網上世界真真假假,你係邊個??無人知道!!對一般網友黎講,一個批評好簡單,幾句說話之嘛!!我及本網就唔同,係絕對要負上責任,如果有人法律追究,你覺得我將你網絡個人資料交出黎可以嗎??處理問題,係要一視同人,我地既無能力又無時間去證實任何人士發出所謂負面言論嘅真確性,消極做法就要求大家一律免談!!而且人性根本天生就唔客觀,就算開始點樣避重就輕,延續落去就一定越講越失控,同埋我諗無人可以肯定唔會有人會利用此處,作一D同行抹黑行為,至於禁止一D對商號正面評語推薦等言論,道理亦同上,於商業合作基礎上,本網亦需保障廣告客戶及本網權益!!
發南油及外地釣團活動帖需經本網審核批准
因此類活動帖過往發現十分之多係商業性,為維護廣告客戶權益,本網必定要做處理,而且更重要一點原因,活動範圍如離開香港,若有任何事故,當發現攪手係商業人士,問題處理就會變得複雜,保險...責任...等等...坦白講,參不參加商業釣團,一個大前題係你都必須事先知道,何人帶隊,服務細節,事故發生如何處理,安全保障等等,如假借活動名義招攬客人,本網角度睇等同詐騙!!所以,如本網不能確定有關人士所出的帖子不屬商業性質,一概謝絕!!
帖子內容及短消息(PM)字詞過濾情況
有網友反映,當發帖,回帖或使用網內短消息,出現一D用詞,網址等會被過濾,而且為何連私用嘅PM都受限制,我會借此工作報告詳細解釋,其實原因好簡單,過濾一些用字,原因有二,其一...基於本網上平台需服務不同年齡地域網友,有部份特別敏感用字實在不方便於帖內出現,亦想減少網友之間矛盾,我強調,被過濾的用字,對各位平常交流並不會做成影響,例如一些宗教,政治性,駡人及粗言穢語字眼,其二...於本網經營運作立場,一些商業網址,不受歡迎網站及商號名稱等等,一律亦係被納入過濾之列,此種做法,係各大網站慣常處理方法,並非香港魚樂網獨有!!因本網系統所有過濾設置係同時套用到帖內容及短消息上,所以有可能會影響各位交換信息,不過有一點我要說明,我明白大部份網友係十分樂意合作,捍衛本網守則,但現實情況此類內容總係會出現,所以設置過濾的列表,暫時都不會有所改變!!
不公平現象
最近曾收PM向我投訴某帖內容普通,為何版主們加如此多分,經我了解,其實並唔係版主偏心,很多係平常網內聊天較多的友好網友所加凡嘅,事實上此位網友原來並唔知道,原來一般級別網友都係有評分權限嘅,經我解釋後事件亦告一段落,通過呢個網友疑問,可以睇到兩個事情,一...事實上不少網友對網站功能上認識不夠,時間許可下,我會多於"網站功能教學"版出帖,二...我明白網友好多時並不在意分數,需要嘅係鼓勵,但關係發展係不能一朝一夕,需要一個溝通過程,希望各位網友好好利用本網平台,與各釣友同好多點交流,你對人多鼓勵同時,他人亦會對你多鼓勵!!
工作報告完畢,感謝各位閱讀
如對上述內容有任何疑問及意見,歡迎與魚樂網各工作人員反映或直接電郵至admin@fishinghk.com |
提升卡
置頂卡
沉默卡
喧囂卡
變色卡
千斤頂
顯身卡
樓主
