2009年度海事處釣魚比賽 10號艇賽後報告

日期 ： 2009年11月8日  
釣點 ： 維多利亞港東部水域
時間 ： 9:00 — 17:15
隊員 ： Kinane、李生、莊生、陳生、同埋花名叫 "董建華"的超級高手

當日非常好彩抽籤抽到一個好艇家，經過之前三次去維港艇釣就知艇家嘅重要性，釣果真係可以相差甚遠，而且呢隻艇較大隻，個生倉開口在船頭中間，船頭可以坐兩個人都得，更好嘢就係有廁所，唔使忍尿喇。

維港釣況真飄忽，上個星期日去實習，釣果相當滿意，我一個人都釣咗11條釘公，上午更釣到細鱗，而同艇釣友亦釣獲芝麻斑、紅魚等，大家可以去以下個帖睇吓
http://www.fishinghk.com/forum/thread-41932-1-1.html

而今次比賽日，釣況可以用慘淡嚟形容，全日一條大魚都釣唔到，釣到的都係細魚，甚至叫做魚毛，想攞奬牌簡直發夢。不過阿李生話我哋冇魚釣，對手都冇魚釣啦，上午在北角碼頭對出釣魚，好景時的確中咗好多釘公，大家畀啲信心啦，但眼見8號艇艇家釣到一條大青斑時，心諗今次輸硬喇。

下午完全冇景勁疏口，艇家話不如去太古城摶吓大魚啦，於是就用沙蝦試吓有冇大魚吼，噢！真失望一個幾鐘，毫毋魚咬餌，艇家話再駛前啲去嘉亨灣對出睇吓有冇或魚釣，又再一次失望，半個鐘之後艇家見冇魚釣到，車返後啲去鯉景灣對出，我嘅奬牌夢就由艇家呢個決定而改寫，因為全艇隊員又再中魚，艇家都釣到一條油追。好喇夠鐘返碼頭磅魚，一上岸見到有條4磅幾嘅細鱗喺個磅上，而地下亦有兩條斤幾細鱗，今年都係冇運行囉，到我哋磅魚時要分開兩次嚟磅，最後結果係25磅3安士，主持人阿肥周話，10號艇好大機會係第一，哈哈有冇搞錯，魚毛攞冠軍。諗番艇家臨尾釣到一條油追成為最重要嘅關鍵，因為10號艇以一磅之微力壓12隊對手，成功奪冠，以魚毛嚟攞第一名，真係好運兼失禮呀！


10號艇從筲箕灣譚公廟碼頭出發




早上食糊位，呢度釣到好多釘公



早上釣點大公開

10號艇總魚獲放在冰箱



由生倉撈魚短片

緊張時刻到喇，睇吓幾多磅先




過磅短片

將啲魚毛攤在報紙上




非常感激阿李生搵到幾位高手做隊友，令我呢個低手都可以得到一個冠軍奬牌

甘多魚獲，利害

咁多魚一定好密口,利害! C兄幾時又搞船釣?

好大条钉公,好少见

咁多魚一定好密口,利害! C兄幾時又搞船釣?
中港釣 發表於 2009-11-16 21:22

                               
登錄/註冊後可看大圖

   
如果11月25日唔凍，可能搞多一次維港大頭艇釣
到時pm你，睇吓你得唔得閒

C兄有釣艇咨料嗎????

好好魚

可唔可以只計大魚.....d 細鱗仔放番佢把啦....