PART 3
序
近日比較忙,又無咩心緒,所以都無野可寫.前兩日,同魚樂網成班十幾人,又食左個"慶合合"既晚飯.席間,PANDA同鬧爆叔又問起PART 3幾時出,其實都已經寫左兩種魚,所以一問之下,的起心肝寫埋其餘3種完成PART 3.
多多指教. 亦多謝大家俾面捧場.
*********************************
＂呻仔魚＂
魚仔有條銀邊用來釣石狗果隻，我到今時今日都未清楚哩隻魚點叫。大約係９０－９１年果陣,４條友３百幾蚊租左架＂砵砵仔＂，買左一斤＂呻仔＂，就直出牛尾州背面＂呔＂石狗。釣釣下魚，覺得好痕，仲越來越痕，係果一年開始，我先至知道，原來Ｄ蚊唔係只係出現係近岸，原來係海中的荒島，Ｄ蚊仲勁多。好痕!
“紅衫魚”
一種我不嬲都以為只有遠洋深海先至有既魚,當我15年前第一次係白沙灣魚排對出既水道釣到既時候,剎那間,個腦就完全不受控制咁去胡思亂想.我都唔記得諗過D咩野,總之諗左好多無謂野,轉左一大個圈,係條魚未死前既最後一個問題,就係…點解個身會有點紅點既?街市買果D無架?係咪死左之後點紅點先至會散既呢?返到屋企,阿媽問點解條紅衫咁細條既,然後終於係點紅點都有無機會散之下,掉左入垃圾桶.
＂坑鰻＂
係我讀書果陣,除左捉”豹虎”外,最攀山涉水既一種野外狩獵活動.以前靚仔果陣,聽係圍村D叔父講過,有個”奄”雞佬,”奄”完雞後係河邊洗手,突然間CHUP一聲,成隻手掌無左.元凶就係＂坑鰻＂. ＂坑鰻＂個樣好似D長頸恐龍,好醜,但好大力.我地有個FRIEND係街市賣雞,我地攞佢賣剩D內臟,踩架單車(BMX呀)走去北潭涌D山澗,或者去萬宜西霸儲水庫,綁隻大鈎,用尼龍繩直出,然後綁係棵樹度,3-4個鐘頭後或隔晚去收絲.有時只係見剩番條咬斷左既尼龍繩.有時,會釣到好似隻腳咁粗既.....
“河蝦”
講起北潭涌山澗,除左＂坑鰻＂外,最令我深刻既,仲有”河蝦”(淡水蝦)同毛蟹(大閘蟹類).其實講魚就唔應該講蝦既,但因為”河蝦”隱藏左我一段同童年既血事,所以先攞來提提,但毛蟹就真係唔講啦.前文提過, 以前讀書屋企無咩錢俾，所以,當唔去＂痴＂Ｄ老味食個陣,就係攀山涉水去搵天然食物-潛水攞帶子,上山摘龍眼等等。而去北潭涌山澗摸石捉蝦,亦係其中一個主打項目.初初就咁摸住水澗D散石底,用手指夾實D蝦然後放落袋,但D河蝦有一隻大鉗,俾佢鉗到都好很痛架.中三果年暑假,一行5人又飛架BMX去捉河蝦.出發時陽光普照,點知捉左兩袋蝦後,天色突然轉暗,大夥即時鬆人,但浦一開車,已經落晒狗屎.大家加速前進,我就例牌包尾.去到一個彎位落科斜,我前面個FRIEND抄車,雨越落越大,我去到佢身邊果陣,佢已經側身布郁都唔郁咁瞓底係馬路石壆坑邊,而佢身下面,係一條由雨水沖合而成既血流湧緊落坑渠.當時嚇到我呆一呆.但前面班友已經唔知去到邊,而且雨聲太大,哎佢地都聽唔到…(中間有太多野,省略).當然,最後個FRIEND無死到,但就連左30針.
＂生魚＂
如無記錯,應該係我第一條斤裝魚.當時大約10歲,仲係外國住,食都唔捨得食咁用左大約港幣二毛子買左3隻鉛頭鈎,再問隔籬屋個阿叔攞左D魚絲,然後去果園掘左D蚯蚓,就走左去種”豬乸菜”既池塘釣魚.當時釣魚真係純粹玩玩下,釣到條”生魚”,屋企又唔會食.果一刻,只係聽過”生魚”對開過刀既人有益,於是就CUT左D蕉葉,包住條魚,就拿拿臨行左約半公里,攞左去俾村口舖仔既老細煲湯俾佢老婆飲.老細開心之餘,竟然俾左個連男仔都可以有既”驚奇”我,就係隨手就攞左一”查”鉛頭鈎俾我.嘩!有成7-8隻架. |
樓主
依,原來仲有讀者架.多謝.
顯身卡
其待緊你的 past three...
